Gjykata Kushtetuese miratoi më 2 nëntor 2026 një aneks të rregullores për shqyrtimin e çështjeve të juridiksionit të rivlerësimit. Aneksi përcakton procedurat për kërkesat e ish-gjyqtarëve dhe ish-prokurorëve të shkarkuar nga vettingu, të cilët kërkojnë rishikimin e vendimeve. Vendimi u mor me shtatë vota pro dhe një kundër.
Sipas rregullores, vëzhguesit ndërkombëtarë të Operacionit Ndërkombëtar të Monitorimit (ONM) mund të njihen me dosjet gjyqësore, provat dhe dokumentet e administruara. Ata mund të jenë të pranishëm në të gjitha fazat e shqyrtimit, përfshirë dhomën e këshillimit, si dhe të paraqesin gjetje dhe mendime me shkrim për rrethana ose fakte të çështjeve konkrete. Gjykata mund t’i marrë këto mendime në konsideratë, por ato nuk kanë vlerën e provës. Vëzhguesit nuk kanë të drejtë vote dhe nuk marrin pjesë në vendimmarrje.
Kërkesat do të shqyrtohen fillimisht nga një kolegj prej tre gjyqtarësh të Gjykatës Kushtetuese. Nëse kolegji vlerëson se kërkesa nuk plotëson kriteret ligjore, mund të vendosë njëzëri që ajo të mos kalojë në seancë plenare. Nëse njëri prej gjyqtarëve ka mendim të ndryshëm, çështja i kalon për shqyrtim paraprak Mbledhjes së Gjyqtarëve.
Seanca plenare do të zhvillohet me pjesëmarrjen e të gjithë gjyqtarëve, por në asnjë rast me më pak se dy të tretat e tyre. Vendimi merret me shumicën e votave të të gjithë gjyqtarëve dhe abstenimi nuk lejohet.
Dispozitat kalimtare përcaktojnë se veprimet procedurale të kryera nga Kolegji i Posaçëm i Apelimit (KPA) para përfundimit të mandatit të tij, më 17 qershor 2026, ruajnë vlefshmërinë dhe efektet juridike. E njëjta gjë vlen për veprimet e Gjykatës Kushtetuese deri në hyrjen në fuqi të aneksit.
Pro votuan Fiona Papajorgji, Sandër Beci, Genti Ibrahimi, Ilir Toska, Marsida Xhaferllari, Asim Vokshi dhe Marjana Semini. Kundër votoi gjyqtarja Sonila Bejtja. Sipas raportimeve të Top Channel dhe Vox News, pas përfundimit të mandateve të institucioneve të vettingut, Gjykata Kushtetuese do të shqyrtojë kërkesat e ish-magjistratëve për kundërshtimin e vendimeve të rivlerësimit.