Kuvendi i Shqipërisë është mbledhur sot për seancën e radhës plenare, e cila pritet të jetë më e zgjatur se zakonisht. Pavarësisht axhendës së parashikuar, Partia Demokratike ka vendosur të mos marrë pjesë, duke ndjekur qëndrimin e mbajtur në seancat e mëparshme për shkak të mosplotësimit të kërkesave të protestuesve.
Në qendër të vëmendjes së seancës është interpelanca me ministrin e Financave, Petrit Malaj, kërkuar nga deputetja Jorida Tabaku. Përveç kësaj, deputetët pritet të votojnë një sërë projektligjesh të rëndësishme, ndër të cilat:
• Projektligji “Për dëftesat tregtare mbi produktet bujqësore”;
• Projektligji “Për censin e bujqësisë”;
• Projektligji “Për menaxhimin e kimikateve” (ndryshime në ligjin nr. 27/2016);
• Projektligji “Për akuakulturën” (ndryshime në ligjin nr. 103/2016);
• Projektligji “Për mbrojtjen e tokës bujqësore” (ndryshime në ligjin nr. 9244);
• Ratifikimi i marrëveshjes për bashkëpunim teknik me Republikën Federale të Gjermanisë për vitin 2025;
• Ratifikimi i marrëveshjes së huas me Bankën Evropiane për Rindërtim dhe Zhvillim (BERZH) për rehabilitimin e hekurudhës Tiranë-Durrës dhe lidhjen me Aeroportin Ndërkombëtar të Tiranës.
Seanca përfshin gjithashtu shqyrtimin dhe miratimin e projektrezolutave për vlerësimin e veprimtarisë së institucioneve të pavarura gjatë vitit 2025, si dhe projektvendime të tjera organizative.
Përditësime
Kuvendi i Shqipërisë ka anuluar interpelancën me ministrin Petrit Malaj për shkak të bojkotit të deputetëve të Partisë Demokratike. Seanca po vijon me një rend dite të zgjeruar, që përfshin ratifikimin e Konventës së Byrosë së Konferencës Evropiane të Aviacionit Civil dhe ndryshimet në Ligjin për Librin. Pavarësisht masave të shtuara të sigurisë, situata përreth Kuvendit mbetet e qetë dhe pa protesta.
Kuvendi i Shqipërisë ka miratuar rendin e ditës me 14 çështje për seancën e radhës, pavarësisht bojkotit të vazhdueshëm të opozitës. Në fokus të diskutimeve do të jenë tri nisma kryesore: ratifikimi i Konventës së Konferencës Evropiane të Aviacionit Civil, ndryshimet në Ligjin për Librin dhe emërimi i një anëtari të ri në Këshillin e Statistikave.
Kuvendi i Shqipërisë përfundoi seancën plenare pas 5 orësh, ndërsa opozita vijon bojkotin. Gjatë kësaj seance u miratuan rezolutat për vlerësimin e punës së 10 institucioneve të pavarura dhe u konfirmua zhvillimi i Censit të bujqësisë në tetor. Në lidhje me projektligjin për mbrojtjen e tokës bujqësore, deputetët Erion Braçe dhe Erald Kapri votuan kundër. Sekretariati publikoi listën e detajuar me votat për çdo projektligj të miratuar.