Kuvendi i Shqipërisë zhvillon sot seancën e radhës plenare, me fokus vlerësimin e performancës së dhjetë institucioneve kushtetuese dhe ligjore për vitin 2025. Rendi i ditës parashikon shqyrtimin dhe votimin e projektrezolutave përkatëse.
Institucionet që do t'i nënshtrohen procesit të monitorimit janë:
• Komisioni Qendror i Zgjedhjeve (KQZ)
• Inspektorati i Lartë i Deklarimit dhe Kontrollit të Pasurive dhe Konfliktit të Interesave (ILDKPKI)
• Banka e Shqipërisë
• Autoriteti i Mbikëqyrjes Financiare (AMF)
• Instituti i Statistikave (INSTAT)
• Autoriteti i Komunikimeve Elektronike dhe Postare (AKEP)
• Radiotelevizioni Shqiptar (RTSH)
• Autoriteti i Mediave Audiovizive (AMA)
• Enti Rregullator i Energjisë (ERE)
• Enti Rregullator i Ujit (ERRU)
Seanca do të nisë në orën 10:00 me miratimin e procesverbaleve të seancave të datave 30 qershor dhe 2 korrik 2026, pasuar nga njoftimet përkatëse. Në mbyllje të punimeve, rendi i ditës parashikon diskutime për çështje dhe shqetësime të ngritura nga zgjedhësit në zonat elektorale.
Ndërkohë, pjesëmarrja e opozitës mbetet e pasigurt, pasi disa forca politike kanë paralajmëruar bojkot të seancës parlamentare si formë proteste. Kjo situatë pasohet nga mungesat e opozitës në seancat e mëparshme dhe tensionet e shfaqura më herët jashtë mjediseve të Kuvendit.
Përditësime
Kuvendi i Shqipërisë nisi sot seancën plenare në mungesë të opozitës, e cila ka bojkotuar punimet. Në sallë janë të pranishëm vetëm deputetët e mazhorancës, të cilët do të vlerësojnë raportet e 10 institucioneve të pavarura. Sipas vendimit të Sekretariatit, debati për secilën projektrezolutë do të zgjasë deri në 120 minuta, ndërsa diskutimet për çështjet e zgjedhësve do të vijojnë për 4 orë.
Kuvendi përfundoi shqyrtimin e 10 projektrezolutave për institucionet e pavarura, por shtyu votimin për seancën e ardhshme plenare. Gjatë diskutimeve, deputetët adresuan shqetësimet e zgjedhësve mbi mangësitë në infrastrukturë, arsim dhe shërbimet shëndetësore.