Kuvendi i Shqipërisë zhvillon sot, më 30 qershor 2026, seancën plenare të radhës në orën 10:00, në përputhje me urdhrin e Kryetarit të Kuvendit, Niko Peleshi.
Punimet do të nisin me miratimin e procesverbalit të seancës së datës 18 qershor 2026 dhe njoftimet procedurale. Pika kryesore e rendit të ditës është shqyrtimi i projektligjit "Për kontrollet zyrtare dhe aktivitete të tjera zyrtare, të kryera për të garantuar zbatimin e legjislacionit për ushqimin dhe ushqimin për kafshë, të rregullimeve për shëndetin dhe mirëqenien e kafshëve, si dhe për shëndetin e bimëve e të produkteve për mbrojtjen e bimëve në Republikën e Shqipërisë".
Në vijim, deputetët do të shqyrtojnë dhe votojnë 8 projektrezoluta për vlerësimin e veprimtarisë vjetore të institucioneve të pavarura për vitin 2025, përfshirë:
- Komisioneri për Mbikëqyrjen e Shërbimit Civil
- Komisioneri për të Drejtën e Informimit dhe Mbrojtjen e të Dhënave Personale
- Departamenti i Administratës Publike
- Autoriteti i Konkurrencës
- Komisioni i Prokurimit Publik
- Autoriteti për Informimin mbi Dokumentet e Ish-Sigurimit të Shtetit
- Instituti i Studimeve për Krimet dhe Pasojat e Komunizmit
- Agjencia e Sigurimit të Depozitave
Seanca do të përmbyllet me diskutime për çështje jashtë rendit të ditës. Për ditën e sotme është paralajmëruar edhe zhvillimi i një proteste, e cila përkon me nisjen e punimeve të Kuvendit.
Përditësime
Protestuesit janë mbledhur përpara godinës së Kuvendit të Shqipërisë gjatë seancës plenare ku po diskutohen 8 projektrezoluta. Pjesëmarrësit kanë hedhur thirrje kundër qeverisë dhe opozitës. Gazetari i Top Channel, Muhamed Veliu, raporton nga vendngjarja për përshkallëzimin e situatës.