Ditën e sotme, ndërsa deputetët janë mbledhur për seancën plenare në orën 10:00, një grup protestuesish u grumbullua jashtë ambienteve të Parlamentit. Tubimi, i njoftuar një ditë më parë nga organizatorët, u shoqërua me tensione, ku protestuesit qëlluan me vezë në drejtim të godinës së Kuvendit.
Deputetët u pritën në hyrje të institucionit me thirrje si “ju erdhi fundi” dhe “opozitë e shitur”. Pjesëmarrësit kanë shprehur kërkesa për dorëheqjen e qeverisë dhe të kryeministrit Edi Rama, duke përdorur parulla të ndryshme, ndërsa organizatorët kanë paralajmëruar edhe një tubim të dytë për mbrëmjen e sotme para Kryeministrisë.
Ndërkohë, brenda sallës, seanca plenare ka vijuar punimet sipas rendit të ditës, i cili përfshin pikat e mëposhtme:
- Miratimi i procesverbalit të seancës së datës 18 qershor 2026.
- Shqyrtimi i projektligjit për kontrollet zyrtare në fushën e ushqimit, ushqimit për kafshë dhe shëndetit të bimëve.
- Diskutimi i disa projektrezolutave për vlerësimin e veprimtarisë vjetore të institucioneve të pavarura për vitin 2025, përfshirë:
- Komisionerin për Mbikëqyrjen e Shërbimit Civil;
- Komisionerin për të Drejtën e Informimit dhe Mbrojtjen e të Dhënave Personale;
- Departamentin e Administratës Publike;
- Autoritetin e Konkurrencës;
- Komisionin e Prokurimit Publik;
- Autoritetin për Informimin mbi Dokumentet e Ish-Sigurimit të Shtetit;
- Institutin e Studimeve për Krimet dhe Pasojat e Komunizmit;
- Agjencinë e Sigurimit të Depozitave.
Përditësime
Protestuesit para Kuvendit kërkojnë shfuqizimin e ligjit për zonat e mbrojtura. Kryesia e Kuvendit konfirmoi se, në përfundim të seancës plenare, do të zhvillohen diskutime për çështje jashtë rendit të ditës.