Kuvendi i Shqipërisë zhvillon sot seancën e radhës plenare, ku në rend të ditës është miratimi i projektrezolutave për veprimtarinë vjetore të institucioneve të pavarura dhe të sistemit të drejtësisë. Në listën e institucioneve që do të raportojnë përfshihen SPAK, KLGJ, KLP, KLSH, ILD dhe Prokuroria e Përgjithshme.
Kreu i Grupit Parlamentar të Partisë Demokratike, Gazment Bardhi, ka njoftuar mbledhjen e deputetëve në orën 11:00 në selinë e partisë. Në njoftimin e tij, Bardhi u ka kërkuar deputetëve të jenë të përgatitur për skenarin e pjesëmarrjes në sallën e Kuvendit, duke theksuar se vendimi përfundimtar do të merret në këtë mbledhje. Opozita ka bojkotuar seancat plenare që prej datës 2 korrik.
Seanca e sotme zhvillohet në një atmosferë tensioni politik, ndërsa jashtë godinës së Kuvendit është paralajmëruar dhe ka nisur grumbullimi i protestuesve. Ky takim shënon një moment të rëndësishëm për punimet e Kuvendit, të cilat pritet të ndërpriten së shpejti për shkak të pushimeve verore.