Kuvendi i Shqipërisë mblidhet këtë të enjte në një seancë plenare me 24 çështje për shqyrtim. Në nisje të seancës është parashikuar interpelanca e kërkuar nga deputetja e Partisë Demokratike, Jorida Tabaku, drejtuar ministrit të Financave, Petrit Malaj, mbi performancën buxhetore, shpenzimet dhe të ardhurat.
Projektligjet dhe marrëveshjet ndërkombëtare
Në vijim, deputetët do të shqyrtojnë disa projektligje sektoriale, ku përfshihen:
• Ndryshimet në ligjin për menaxhimin e kimikateve dhe atë për akuakulturën.
• Aktet ligjore për censin e bujqësisë, dëftesat tregtare mbi produktet bujqësore dhe mbrojtjen e tokës bujqësore.
• Ndryshime në ligjin "Për librin në Republikën e Shqipërisë".
Kuvendi do të shqyrtojë gjithashtu ratifikimin e disa marrëveshjeve ndërkombëtare:
• Marrëveshjen e huas me Banka Evropiane për Rindërtim dhe Zhvillim (BERZH) për rehabilitimin e linjës hekurudhore Tiranë–Durrës dhe lidhjen me Aeroportin Ndërkombëtar të Tiranës.
• Marrëveshjen e bashkëpunimit teknik me Gjermaninë.
• Konventën për Byronë e Konferencës Evropiane të Aviacionit Civil.
Institucionet e pavarura
Një pjesë e seancës i kushtohet miratimit të projektrezolutave për vlerësimin e veprimtarisë së institucioneve të pavarura për vitin 2025, ndër të cilat bëjnë pjesë KQZ, Banka e Shqipërisë, AMF, INSTAT, AKEP, RTSH, AMA, ERE, ERRU dhe ILDKPKI. Kuvendi pritet të votojë edhe për emërimin e një anëtari të ri në Këshillin e Statistikave.
Përditësime
Seanca plenare në Kuvendin e Shqipërisë nisi në orën 10:00 në një atmosferë të tensionuar. Përpara nisjes së punimeve, janë raportuar përplasje verbale mes deputetëve, ndërsa qëndrimet mbeten të ndara lidhur me pjesëmarrjen e opozitës. Fokusi i rendit të ditës është përqendruar te financat dhe hekurudha, ndërkohë që burime brenda Kuvendit nuk përjashtojnë mundësinë e zhvillimit të protestave gjatë orëve në vijim.