Gjatë seancës plenare të kësaj të enjteje, Kuvendi i Shqipërisë nderoi me një minutë heshtje efektivin e Policisë së Shtetit, Enea Mekolli, i cili humbi jetën gjatë një operacioni policor. Propozimi për këtë homazh u bë nga kryetari i grupit parlamentar të Partisë Socialiste, Taulant Balla, i cili konfirmoi se Mekolli është shpallur zyrtarisht Dëshmor i Atdheut.
Ngjarja tragjike ndodhi në fshatin Lozhan të Maliqit, gjatë një operacioni për kapjen e shtetasit Violand Braçellari. Sipas informacioneve zyrtare, autori, i cili prej kohësh i fshihej drejtësisë, hapi zjarr ndaj forcave të rendit. Si pasojë, humbi jetën Enea Mekolli dhe mbeti i plagosur efektivi Edison Adri. Autori i ngjarjes u vu në pranga nga Policia e Shtetit pasi mbeti i plagosur gjatë shkëmbimit të zjarrit.
Në fjalën e tij, Taulant Balla kërkoi dënimin maksimal për autorin, duke theksuar se "gjaku i Policisë së Shtetit është gjaku i vetë shtetit" dhe se çdo sulm ndaj uniformës është sulm ndaj shtetit. Nënkryetarja e Kuvendit, Klodjana Spahiu, shprehu vlerësimin për sakrificën e efektivit dhe uroi shërim të shpejtë për punonjësin e plagosur.
Përditësime
Hetimet konfirmuan të kaluarën kriminale të autorit, i cili prej vitesh u fshihej autoriteteve në zonën malore të Korçës, duke iu shmangur disa herë operacioneve të Policisë së Shtetit.