Ministri i Brendshëm, Besfort Lamallari, dhe drejtori i Përgjithshëm i Policisë së Shtetit, Skënder Hita, kanë vizituar familjen e efektivit Enea Mekolli për të shprehur ngushëllimet për humbjen e tij. Ngjarja ndodhi gjatë një operacioni të forcave "Shqiponja", ku gjashtë efektivë u përballën me Violand Braçellarin.
Sipas informacioneve, i kërkuari hapi zjarr mbi efektivët, duke shkaktuar vdekjen e Enea Mekollit dhe plagosjen e kolegut të tij, Edison Adri, i cili mori lëndime në kokë dhe qafë. Gjatë përplasjes, autori Violand Braçellari mbeti i plagosur në dorë dhe bark, por ndodhet jashtë rrezikut për jetën.
Familja e të ndjerit ka kërkuar që Enea Mekolli të prehet në varrezat e fshatit të tij të lindjes, pranë vëllait të ndjerë, i cili gjithashtu kishte shërbyer në radhët e policisë. Kjo kërkesë bie ndesh me statusin e "Dëshmorit të Atdheut", i cili parashikon varrosjen në varrezat e dëshmorëve në Tiranë, por autoritetet kanë respektuar dëshirën e familjarëve. Homazhet janë planifikuar për orën 12:00 në Pogradec, ndërsa ceremonia e varrimit do të zhvillohet në orën 14:00.
Përditësime
Familjarët kanë njoftuar detajet e ceremonisë lamtumirëse për efektivin Enea Mekolli. Homazhet do të zhvillohen në Qendrën Kulturore të Pogradecit, nga ora 10:00 deri në 12:00, pas së cilave do të kryhet varrimi në fshatin Blacë. Lidhur me raportimet e mëparshme, familja sqaroi se vëllai i efektivit ka ndërruar jetë si pasojë e një sëmundjeje dhe jo gjatë shërbimit policor.