Në mbledhjen e mbajtur të mërkurën, më 10 qershor, Këshilli i Ministrave miratoi vendimet për mbështetjen financiare të familjeve të dy efektivëve të Policisë së Shtetit, të përfshirë në operacionin e datës 4 qershor në Lozhan të Maliqit. Ministri i Brendshëm, Besfort Lamallari, deklaroi se shteti mbetet i përkushtuar për të mbështetur familjet e punonjësve të policisë që u përballën me krimin.
Sipas vendimit, familja e Dëshmorit të Atdheut, Enea Mekolli, do të përfitojë shumën prej 5 milionë lekësh, ndërsa efektivi i plagosur, Edison Adri, do të përfitojë 3 milionë lekë. Enea Mekolli, 34 vjeç, humbi jetën gjatë operacionit për kapjen e të shumëkërkuarit Violand Braçellari, i cili mbeti gjithashtu i plagosur dhe ndodhet në spital.
Krahas shpërblimit të menjëhershëm, Ministria e Punëve të Brendshme po ndjek procedurat ligjore për të siguruar trajtim të përmuajshëm financiar për fëmijën e efektivit të ndjerë, në përputhje me Ligjin “Për statusin ‘Fëmijë në Përkujdesje të Republikës’”, trajtim i cili do të vijojë deri në mbushjen e moshës madhore. Ndërkohë, Edison Adri, 36 vjeç, i cili u plagos në të njëjtin operacion, vijon të marrë ndihmën e nevojshme mjekësore.