Drejtori i Përgjithshëm i Policisë së Shtetit, Skënder Hita, vizitoi familjen e Inspektorit Enea Mekolli, i cili humbi jetën në krye të detyrës gjatë një operacioni policor në Maliq të Korçës. Vizita u zhvillua me rastin e ditëlindjes së parë të djalit të efektivit të ndjerë, për të cilin shteti ka marrë përsipër mbështetjen e plotë.
Gjatë takimit, Hita dorëzoi medaljen e mirënjohjes akorduar pas vdekjes për inspektorin Mekolli, si dhe dokumentacionin që i njeh djalit të tij statusin “Fëmijë në përkujdesje të Republikës”. Ky status i garanton fëmijës përfitimin e pagës së plotë të babait deri në përfundim të arsimit të lartë, si dhe shërbim shëndetësor dhe arsimor falas.
Krahas mbështetjes institucionale, familjes iu dorëzua një fond prej 7 milionë lekësh të rinj, i cili u mblodh si kontribut vullnetar dhe shenjë solidariteti nga punonjësit e Policisë së Shtetit. Drejtuesi Hita siguroi familjarët se institucionet shtetërore, përfshirë Ministrinë e Brendshme, do të vazhdojnë të mbështesin familjen në çdo nevojë.
Inspektori Enea Mekolli u vra më 4 qershor gjatë operacionit për kapjen e shtetasit Violand Braçellari, ngjarje në të cilën mbeti i plagosur edhe efektivi Edison Adri.
Përditësime
Drejtori i Përgjithshëm i Policisë së Shtetit, Skënder Hita, shoqëruar nga drejtues të lartë të institucionit, vizitoi familjen e Dëshmorit të Atdheut, Enea Mekolli. Gjatë takimit, Hita konfirmoi transferimin e ndihmës financiare prej 7 milionë lekësh në llogarinë bankare të familjes, duke theksuar se: 'Kjo mbështetje është detyrimi ynë moral ndaj familjeve që sakrifikuan jetën në shërbim të vendit'.