Ceremonia mortore për efektivin e policisë Enea Mekolli do të zhvillohet ditën e premte. Megjithëse statusi i dëshmorit të atdheut parashikon që i ndjeri të prehet në Varrezat e Dëshmorëve, familja e tij ka kërkuar zyrtarisht që ai të varroset në varrezat e fshatit të lindjes.
Kjo kërkesë është bërë për shkak të dëshirës së familjarëve që efektivi të prehet pranë vëllait të tij, gjithashtu efektiv policie, i cili ka ndërruar jetë më herët si pasojë e një sëmundjeje.
Sipas njoftimeve, homazhet në nderim të punonjësit të policisë do të organizohen në qytetin e Pogradecit duke filluar nga ora 12:00. Ceremonia e varrimit do të zhvillohet në orën 14:00 në vendlindjen e të ndjerit, konform dëshirës së familjes.