Kuvendi i Shqipërisë votoi më 12 mars 2026 kundër kërkesës së Prokurorisë së Posaçme kundër Korrupsionit dhe Krimit të Organizuar (SPAK) për kufizimin e imunitetit të deputetes socialiste Belinda Balluku, ish-zëvendëskryeministres. Vendimi u mor me 82 vota kundër kërkesës.
Dhjetë organizata të shoqërisë civile reaguan me një deklaratë të përbashkët, duke shprehur shqetësimin për mosmiratimin e kërkesës. Çështja ka qendruar për më shumë se tre muaj në debat publik, me vonesa nga Kuvendi krahasuar me precedentët e mëparshëm.
Në deklaratë thuhet se ky rast teston funksionimin e institucioneve demokratike, barazinë para ligjit dhe besueshmërinë e reformës në drejtësi. Organizata theksojnë se qytetarët presin hetim të shpejtë dhe pa pengesa për dyshimet penale në nivelet e larta të qeverisjes.
Ato vlerësojnë se imuniteti parlamentar nuk duhet të shërbejë si mburojë ndaj masave të sigurisë në proces penal, pasi ky koncept garanton vetëm lirinë e fjalës dhe votës së deputetit. Kërkojnë nga organet e drejtësisë të vazhdojnë punën në mënyrë të pavarur nga presioni politik.
Deklarata nënvizon se publiku pret që institucionet të dëshmojnë se askush nuk është mbi ligjin dhe se reforma në drejtësi është proces i pakthyeshëm drejt rrugës europiane. Shoqëria civile angazhohet për monitorim dhe mbrojtje të shtetit të së drejtës.
Organizatat nënshkruese:
• Komiteti Shqiptar i Helsinkit (KSHH)
• Albanian Woman in Audiovisual (AWA)
• Qendra Shqiptare për Kërkim Ekonomik (ACER)
• Qendra Shkencë dhe Inovacion për Zhvillim (SCIDEV)
• Qendresa Qytetare
• Instituti për Demokraci dhe Ndërmjetësim (IDM)
• Instituti për Studime Politike (ISP)
• Qendra për Mbrojtjen e të Drejtave të Fëmijëve në Shqipëri (CRCA)
• Together for Life
• Instituti Shqiptar i Shkencës (AIS)
Përditësime
Ambasada e Suedisë në Tiranë shprehu reagimin e saj ndaj votimit të Kuvendit që refuzoi kufizimin e imunitetit të Ballukut.