Besfort Lamallari, ministër i Punëve të Brendshme, mbajti fjalën e rastit në Forumin Ndërkombëtar për Migracionin në Organizatën e Kombeve të Bashkuara (OKB) më 8 maj 2026. Ai foli në emër të Republikës së Shqipërisë, duke theksuar rolin e vendit si origjinë, tranzit dhe destinacion për migrantët.
Lamallari rikonfirmoi angazhimin e Shqipërisë për një migracion të sigurt, të rregullt dhe të ligjshëm, të mbështetur në të drejtat e njeriut, bashkëpunimin ndërkombëtar dhe fuqizimin e diasporës shqiptare. Ai nënvizoi se migracioni formëson shoqërinë dhe ekonominë shqiptare, si dhe zhvillimin në përputhje me prioritetet kombëtare dhe integrimin në Bashkimin Evropian.
Që nga miratimi i Paktit Global për Migracionin (GCM), Shqipëria ka zbatuar një qasje gjithëpërfshirëse, në bashkëpunim me Organizatën Ndërkombëtare për Migracionin (OIM), Rrjetin e OKB-së për Migracionin dhe partnerë të tjerë. Kjo ka çuar në përgatitjen e Raportit Vullnetar për periudhën 2023–2025.
Progresi në tre fusha kryesore
Lamallari evidentoi tre fusha progresi:
- Përmirësimi i sistemeve të të dhënave për politika të bazuara në evidencë.
- Strategjia Kombëtare për Migracionin 2024–2030, që harmonizon masat me 23 objektivat e GCM-së dhe forcon mekanizmin ndërinstitucional për mbrojtjen e të drejtave të migrantëve dhe refugjatëve.
- Partneritete rajonale dhe globale për qeverisje moderne të migracionit.
Gjatë vizitës në SHBA, Lamallari kreu një vizitë në Policinë e New York, për shkëmbim eksperience në menaxhimin e migracionit.