Besfort Lamallari, ministër i Punëve të Brendshme, ndodhet për vizitë zyrtare në New York, ku merr pjesë në Forumin Ndërkombëtar për Rishikimin e Migracionit në Organizatën e Kombeve të Bashkuara. Në panelin me temë “Migracioni si forcë krijuese”, ai ndau rrugëtimin e Shqipërisë dhe qasjen gjithëpërfshirëse ndaj migracionit, të lidhur me zhvillimet politike, ligjore, ekonomike dhe të sigurisë.
Lamallari përmendi Samitin e katërt të Diasporës në Tiranë si celebrim të angazhimeve nga samiti i parë, ku premtimi për votën e diasporës u bë realitet. Ai theksoi se Shqipëria është tërheqëse për ata që duan të kthehen dhe të kontribuojnë, si dhe për mijëra të huaj që vizitojnë, punojnë dhe investojnë në vend.
Gjatë diskutimit, ministri solli në vëmendje dyfishimin e GDP-së së Shqipërisë, me objektiv 35 miliardë euro deri në fund të dekadës. Ai deklaroi se të ardhurat për frymë kanë kaluar nga më pak se 3000 euro në 11 mijë euro, me synim 15 mijë euro në fund të dekadës. Këto zhvillime reflektohen në 12 milionë turistë vitin e fundit dhe rritjen e investimeve të huaja nga 300-400 milionë euro në 1.6 miliardë euro vitin e kaluar.
Lamallari nënvizoi se migracioni, siguria, ekonomia, drejtësia dhe liritë politike janë të pandashme nga transformimi i vendit dhe shoqërisë shqiptare. Në seancën plenare të nesërme, ku do të jetë i pranishëm António Guterres, sekretar i përgjithshëm i OKB-së, ai do të mbajë fjalim për qasjen e Shqipërisë ndaj politikave migratore dhe rolin në Ballkanin Perëndimor dhe Evropë.