Gjykata e Posaçme e Apelit vendosi rikthimin në burg të ish-ministrit të Mjedisit Lefter Koka lidhur me aferën e inceneratorit të Tiranës. Vendimi mbetet i paekzekutuar pasi Koka ndodhet jashtë vendit prej afro katër muaj e gjysmë.
Avokati Maksim Sota deklaroi se Koka ka pasur probleme shëndetësore që nga koha e burgimit. Pas lirimit në dhjetor ai udhëtoi jashtë vendit për të marrë trajtim më të specializuar. Sota shtoi se vendimi i Apelit i është njoftuar klientit të tij dhe se Koka do të kthehet sapo të përfundojë kurimin.
Më 16 prill 2025 Gjykata e Shkallës së Parë dënoi Kokën me dy vjet burgim për shpërdorim detyre në bashkëpunim në procedurat e inceneratorit të Tiranës. Gjykata urdhëroi shuarjen e masës së sigurimit me argumentin se dënimi ishte konsumuar gjatë paraburgimit, por vendime të tjera për koncesionet e Elbasanit dhe Fierit penguan lirimin e tij. Koka u lirua në dhjetor nga Gjykata e Durrësit pasi kishte vuajtur dënimet e dhëna. Apeli pranoi kërkesën e prokurorit për rillogaritje të dënimit dhe urdhëroi që Koka të vuajë pjesën e mbetur.