Gjykata Themelore në Prishtinë ka vendosur të heqë masën e paraburgimit njëmujor për shtatë drejtorë të institucioneve arsimore dhe shëndetësore që veprojnë në Kosovë sipas sistemit të Serbisë. Masa e paraburgimit është zëvendësuar me detyrimin për paraqitje të rregullt në stacionin policor, pas kërkesës së Prokurorisë.
Sipas njoftimit zyrtar, gjykata ka bërë të ditur se në rast të mosrespektimit të masës së re, konform nenit 182 të Kodit të Procedurës Penale, do të urdhërohet sërish caktimi i paraburgimit. Avokatja Jovana Fillipoviq konfirmoi se të pandehurit do të mbrohen në liri. Ata ishin arrestuar më 21 maj, me arsyetimin e rrezikut të ikjes ose përsëritjes së veprës penale.
Hetimet ndaj drejtorëve nisën pas pretendimeve të liderit të partisë Liri, Drejtësi dhe Mbijetesë, Nenad Rashiq, i cili akuzoi Listën Serbe për presion dhe shantazh ndaj mbështetësve të tij. Rashiq deklaroi se rreth 20 persona janë pushuar nga puna nga institucionet serbe për shkak të bindjeve të tyre politike, ndërsa pritet shkarkimi i 40 të tjerëve në komunën e Graçanicës.
Personat për të cilët u ndryshua masa e sigurisë janë:
- Lubisha Karaxhiq, drejtor i shkollës fillore “Milladin Mitiq” në Lllapna Sellë;
- Boban Petroviq, drejtor i Shkollës së Mesme Elektroteknike në Sushicë;
- Millica Dimiq, drejtoreshë e shkollës fillore “Braqa Aksiq” në Lipjan;
- Nebojsha Rashiq, drejtor i Shkollës së Mesme të Makinerisë në Preoc;
- Bratisllav Llaziq, drejtor i Qendrës Klinike-Spitalore në Graçanicë;
- Mirjana Dimitrijeviq, drejtoreshë e Shtëpisë së Shëndetit në Graçanicë;
- Sasha Mlladenoviq, drejtor i Shtëpisë së Shëndetit në Gushtericën e Ulët.