Policia e Kosovës ka zhvilluar një aksion në komunën e Kamenicës, ku janë arrestuar dy drejtorë të shkollave të sistemit paralel serb. Lajmi është konfirmuar zyrtarisht nga kryetari i Komunës së Kamenicës, Kadri Rahimaj, i cili e ka cilësuar këtë operacion si një ndër më të rëndësishmit të ndërmarrë në këtë qytet gjatë viteve të fundit.
Sipas njoftimit, aksioni është zhvilluar pas një pune intensive të organeve të rendit, në kuadër të të cilit janë bastisur shtëpi dhe lokale. Dy të arrestuarit, të identifikuar me inicialet N.V. dhe D.K., mbahen nën dyshimin për kryerjen e veprave penale, ndërsa detajet mbi natyrën e tyre mbeten ende të paspecifikuara.
Kryetari Rahimaj deklaroi se këta individë kishin vështirësuar punën e institucioneve lokale dhe kishin shkaktuar shqetësim te komuniteti për një periudhë të gjatë. Ai siguroi se Komuna e Kamenicës mbetet e angazhuar për trajtimin e të gjithë qytetarëve pa dallim, në koordinim të plotë me institucionet shtetërore për ruajtjen e sigurisë së përgjithshme.
Lidhur me detajet e operacionit dhe veprat penale për të cilat dyshohen të arrestuarit, Prokuroria Themelore në Gjilan ende nuk ka publikuar informacione shtesë.