Nxënësi i klasës së 9-të, Loris Qosja, ka shënuar një tjetër sukses për arsimin shqiptar, duke fituar medaljen e artë në finalen e madhe të International STEM Olympiad, të zhvilluar në Itali. Ky kompeticion mblodhi përfaqësues nga 56 shtete të ndryshme.
Loris Qosja nuk është i panjohur për sukseset në arenën ndërkombëtare. Në fillim të këtij viti, ai përfaqësoi Shqipërinë në "Neo Science Olympiad" në Orlando, SHBA, ku u vlerësua me medalje ari në matematikë dhe medalje bronzi në kimi.
Në një reagim pas këtij suksesi, 15-vjeçari theksoi se medalja e artë është fryt i punës, angazhimit dhe sakrificës së vazhdueshme. Ai shprehu krenarinë për ngritjen e flamurit shqiptar në arenën ndërkombëtare dhe falënderoi mësuesen e tij, Flutura Hoxholli, si dhe të gjithë mbështetësit që e kanë shoqëruar gjatë këtij rrugëtimi akademik.
Përditësime
Nxënësi nga Cërriku, Loris Qosja, është shpallur fitues i medaljes së artë në disiplinën e matematikës në Olimpiadën STEM. Suksesi është konfirmuar zyrtarisht nga shkolla '7 Marsi'.