Molos Gashi, nxënës 10-vjeçar i klasës së pestë në shkollën „Qamil Batalli“ në Prishtinë, fitoi katër medalje në garat ndërkombëtare „Neo Science Olympiad“ dhe „Coding Olympiad – Grand Final“, të zhvilluara në Orlando të Shteteve të Bashkuara.
Garat mbledhën pjesëmarrës nga mbi 21 shtete të botës. Molos Gashi siguroi dy medalje të arta në kategoritë Shkencë dhe Inteligjencë Artificiale, një medalje argjendi në Kodim dhe Programim, si dhe një medalje bronzi në Matematikë.
Nxënësi tregoi përkushtim të madh në përgatitje. „Kam ushtruar shumë çdo ditë, kam lexuar libra, kam bërë ushtrime në kompjuter dhe nuk jam dorëzuar edhe kur ishte e vështirë. Kur fitova medaljet, u ndjeva shumë i lumtur“, tha ai. Interesi për shkencë dhe teknologji ka filluar që në moshë të hershme. „Më ka pëlqyer gjithmonë matematika dhe kompjuteri. Që i vogël më pëlqente të zgjidhja probleme dhe të mësoja gjëra të reja“, shtoi Gashi.
Mësuesja Lumturie Spahija Zyhrani vlerësoi talentin dhe punën e nxënësit. „Molosi është një nxënës shumë i përkushtuar dhe i zgjuar. Prindërit kanë pasur një rol të madh duke e mbështetur vazhdimisht“, tha ajo. Ajo kujtoi emocionin e momentit: „Kur mora vesh për medaljet, më dolën lot gëzimi. Është krenari për shkollën, për familjen dhe për Kosovën“.
Drejtori i shkollës Liridon Maliqi e quajti arritjen një sukses të madh. „Ky është një sukses jo vetëm për Molosin, por për gjithë shkollën dhe sistemin arsimor. Fitimi i medaljes në Inteligjencë Artificiale në këtë moshë është diçka e rrallë dhe shumë domethënëse“, deklaroi ai.
Nxënësi u kthye nga SHBA jo vetëm me medalje, por edhe me përvoja dhe kujtime të paharrueshme.