Një ngjarje aksidentale është regjistruar mëngjesin e kësaj të shtune në afërsi të një pikëpushimi për drejtuesit e mjeteve në Lushnje, pranë rrugës që të çon në Këmishtaj. Një furgon, i cili mbante targa të Maqedonisë së Veriut, u përfshi nga flakët ndërsa po transportonte një ngarkesë me zogj të vegjël të fushës drejt jugut të Shqipërisë.
Drejtuesi i mjetit ka konstatuar zjarrin vetëm pasi ka dalë nga autostrada dhe ka marrë kthesën në drejtim të Këmishtajt. Shërbimet e zjarrfikëses së Lushnjës kanë mbërritur menjëherë në vendngjarje pas njoftimit të marrë dhe kanë ndërhyrë për shuarjen e flakëve që kishin përfshirë kabinën e drejtuesit.
Pavarësisht ndërhyrjes së shpejtë të forcave zjarrfikëse, bilanci i ngjarjes është i rëndë sa i përket dëmeve ekonomike. Një pjesë e konsiderueshme e ngarkesës është dëmtuar, ndërsa më shumë se gjysma e zogjve kanë ngordhur si pasojë e flakëve.
Grupi hetimor dhe shërbimi zjarrfikës i Lushnjës kanë bërë vlerësimet paraprake në lidhje me shkaqet e zjarrit. Dyshohet se zjarri është shkaktuar nga një defekt teknik në sistemin e kondicionimit, i cili ndodhej në pjesën e prapme të mjetit ku mbahej ngarkesa. Autoritetet vijojnë punën për zbardhjen e plotë të rrethanave të ngjarjes.