Ministri në detyrë i Mbrojtjes, Ejup Maqedonci, ka reaguar ndaj deklaratës së ministres në Qeverinë e Serbisë, Sezhana Paunoviq, lidhur me çështjen e spastrimit etnik në Kosovë. Maqedonci i cilësoi këto komente si qëndrime ultrashoviniste, të cilat sipas tij, shpërfaqin frymën gjenocidiste që vazhdon të jetë e pranishme në politikëbërjen serbe.
Sipas Maqedoncit, këto deklarata nuk përbëjnë raste të izoluara, por reflektojnë një qasje të vazhdueshme të politikës serbe, e cila rrezikon sigurinë dhe stabilitetin afatgjatë në të gjithë rajonin e Ballkanit Perëndimor. Ai nënvizoi se këto qëndrime rikujtojnë politikat agresive të viteve '90.
Ministri theksoi se përpjekjet për stabilitet mbeten të brishta përderisa Serbia vazhdon ta mbajë Kosovën në kushtetutën e saj si pjesë të territorit serb. Maqedonci vlerësoi se Kosova gëzon sot një pozitë më të fuqishme sa i përket sigurisë, duke shtuar se distancimet e mundshme të presidentit serb, Aleksandar Vuçiç, ndaj kësaj deklarate nuk e ndryshojnë faktin që institucionet serbe shfaqin një qasje hegjemoniste ndaj fqinjëve.