Në gjashtë muajt e parë të vitit 2026, Maqedonia arkëtoi 1,92 miliardë denarë, ose pak më shumë se 31 milionë euro, nga taksat rrugore. Sipas raportimeve, kjo është shuma më e lartë e regjistruar për këtë periudhë. Krahasuar me të njëjtën periudhë të vitit të kaluar, arkëtimet u rritën me 21,9 milionë denarë, ose rreth 350 mijë euro. Gjatë gjithë vitit të kaluar, të ardhurat nga taksat rrugore kaluan 67 milionë euro.
Ndërmarrja Publike për Rrugë Shtetërore po shqyrton modernizimin e sistemit të pagesave, përfshirë përdorimin e pajisjeve elektronike TAG për regjistrimin e automjeteve në hyrje dhe dalje të autostradave. Analizat fillestare janë përqendruar te rruga Kërçovë–Ohër, ndërsa po shqyrtohet edhe mundësia e shtrirjes së sistemit në segmente të tjera.
Planet përfshijnë edhe autostradat që po ndërtohen në kuadër të Korridorit 8 dhe Korridorit 10d, në projektin me kompaninë Bechtel dhe Enka. Ndërmarrja po shqyrton mundësinë që automjetet të hyjnë dhe të dalin në çdo nyje të autostradës. Për këtë do të nevojitej organizimi i hyrjeve dhe daljeve në nyje, si dhe përshtatja e infrastrukturës, në mënyrë që të regjistrohet lëvizja e automjeteve dhe të llogaritet pagesa sipas modelit të përzgjedhur. Sipas ndërmarrjes, kjo do të kërkonte ndërhyrje të mëdha ndërtimore dhe teknike, veçanërisht në segmentet ku infrastruktura ekzistuese nuk i plotëson kushtet e nevojshme.
Modernizimi synon të mundësojë lëvizje më të shpejtë, përdorim më të gjerë të pagesave elektronike dhe pakësim të kolonave e ndalesave në pikat e pagesës.
Sipas Ndërmarrjes Publike për Rrugë Shtetërore, pika e Tetovës regjistron numrin më të madh të automjeteve. Të ardhurat më të larta, të llogaritura sipas shumës së mbledhur dhe çmimit të biletave, shënohen në pikën e Rramanlit, pranë Kumanovës. Pas saj, sipas të ardhurave, renditen pikat e pagesës në Miladinoc, Petrovec, Gllumovë, Zhelinë, Tetovë, Stobi, Preod, Gostivar, Sopot, Gjevgjeli, Kadrifakovë, Otovicë dhe Demir Kapi.