Maqedonia e Veriut po shqyrton kalimin drejt pagesave elektronike dhe tarifimit sipas distancës së përshkuar në autostradë, por për momentin nuk planifikon zëvendësimin e pikëpagesave me vinjeta. Ministri i Transportit, Aleksandar Nikolloski, tha se analizat tregojnë se mbi 70 për qind e automjeteve vendase nuk dalin nga komuna ku janë regjistruar, ndërsa autostradat dhe rrugët ekspres i përdor rreth 30 për qind e tyre.
Sipas Nikolloskit, një vinjetë e përgjithshme do të sillte shpenzim shtesë për pronarët që i përdorin rrallë këto rrugë. Në diskutim është edhe trafiku transit: Korridorin 10 e shfrytëzojnë rreth 4,5 milionë automjete në vit dhe një pjesë e konsiderueshme e të ardhurave nga pikëpagesat vjen nga udhëtarët e huaj. Të ardhurat nga pagesat rrugore arritën në rreth 67,6 milionë euro gjatë vitit 2025.
Ndërmarrja Publike për Rrugë Shtetërore po analizon një sistem elektronik të mbyllur, ku tarifa do të llogaritej sipas kilometrave të përshkuar. Modeli po shqyrtohet për Korridorin 8, ndërsa po zgjerohet përdorimi i pajisjeve M-TAG dhe i pagesave elektronike. Nëse zbatohet, drejtuesit që përshkojnë distanca më të gjata do të paguajnë më shumë, ndërsa ata që përdorin segmente të shkurtra do të paguajnë më pak.
Mundësia e vinjetave nuk është përjashtuar si model në çdo rrethanë. Në disa vende evropiane, vinjetën e blejnë vetëm drejtuesit që përdorin rrjetin përkatës rrugor dhe mund të zgjedhin periudhën e vlefshmërisë. Ende po vlerësohet nëse një zgjidhje e tillë do të ishte më e dobishme për shtetin dhe përdoruesit e rregullt.
Nuk është vendosur nëse sistemi i tarifimit sipas kilometrave do të përfshijë abonime ose lehtësime për qytetarët që udhëtojnë çdo ditë drejt vendit të punës.