Sipas të dhënave të publikuara nga Eurostat, Shqipëria kishte 328 automjete të pasagjerëve për 1000 banorë në vitin 2024, në krahasim me 232 që ishte ky tregues në vitin 2022, para Censusit të vitit 2023.
Censi i vitit 2023 reduktoi numrin e banorëve në 2.36 milionë, me të paktën 400 mijë më pak, çka bëri të rriten treguesit për frymë. Kjo rritje i dedikohet kryesisht rregullimit statistikor të popullsisë, ndonëse Shqipëria mbetet ndër vendet me nivele më të ulëta në Europë.
Mesatarja e Bashkimit Evropian në vitin 2024 ishte 578 automjete për 1000 banorë, pra 75% më e lartë se në Shqipëri. Në nivel evropian, normat më të larta u regjistruan në Itali (701), Luksemburg (670), Finlandë (666) dhe Qipro (661).
Krahasimi rajonal
• Bosnjë Hercegovinë: 321
• Maqedoni e Veriut: 318
• Kosovë: 232
• Mali i Zi: 417
• Serbi: 377
Shqipëria ka lënë pas Bosnjën, Maqedoninë dhe Kosovën, por mbetet pas Malit të Zi dhe Serbisë. Sipas Drejtorisë së Përgjithshme të Transportit Rrugor, në fund të vitit 2025 numri i autoveturave arriti në 847 mijë, duke e çuar treguesin në 358 për 1000 banorë, sërish më të ulët se Serbia.
Ky tregues vjen në kontrast me trafikun e dendur në rrugët ndërqytetase dhe brenda qyteteve si Tiranë dhe Durrës, si dhe ndotjen e lartë nga automjetet me naftë, që përbëjnë 66% të totalit të regjistrimeve në 2024.