Ministri i Administratës Publike në Malin e Zi, Marash Dukaj, ka reaguar ndaj incidentit të ndodhur mbrëmjen e së premtes në pikën kufitare midis Malit të Zi dhe Bosnjë-Hercegovinës. Një autokolonë me përfaqësues të diasporës shqiptare, e cila po udhëtonte drejt Shqipërisë, është ndaluar nga autoritetet policore. Sipas raportimeve, policia u ka kërkuar udhëtarëve heqjen e flamujve dhe simboleve kombëtare shqiptare nga automjetet.
Në një reagim të publikuar në rrjetin social “X”, ministri Dukaj e ka konsideruar të papranueshme sjelljen e forcave të rendit. Ai ka theksuar se flamuri shqiptar nuk përbën kërcënim, por është simbol i identitetit, lirisë dhe vazhdimësisë historike. “Nuk është mirë që të vazhdojnë standardet e dyfishta ndaj flamurit shqiptar nga ana e policisë. Nuk ka pse të kenë frikë nga flamujt shqiptarë. Përkundrazi, duhet të respektohen qytetarët që e mbajnë atë”, u shpreh ministri.
Dukaj rikujtoi se vendosja e simboleve kombëtare shqiptare në Malin e Zi është në përputhje me ligjin. Ai përmendi faktin se më 28 janar 2021, një delegacion i Këshillit Kombëtar të Shqiptarëve, i përbërë nga Faik Nika, Lindon Gjelaj dhe Genci Nimanbegu, i kishte dorëzuar etalonet e stemës, flamurit dhe himnin e shqiptarëve kryetarit të atëhershëm të Kuvendit, Aleksa Bečić.
Ministri i bëri thirrje autoriteteve malazeze për respektimin e të drejtave të të gjithë popujve dhe krijimin e rregullave më të drejta, duke nënvizuar se vetëm në këtë mënyrë shteti mund të ecë përpara drejt standardeve evropiane. Sipas ministrit, ndërhyrje të ngjashme janë shënuar edhe gjatë periudhës së verës në dasma dhe festa në Malin e Zi.