Enkel Rexhepi, kryetar i Këshillit Kombëtar Shqiptar (KKSh) në Luginën e Preshevës, pranoi procedurën e kundërvajtjes ndaj tij dhe institucionit që përfaqëson. Kundërvajtja u njoftua për vendosjen e flamurit shqiptar gjatë një aktiviteti përkujtimor në nderim të Jonuz Musliut, ish-kryetar i KKSh-së dhe zëvendëskryetar i Komunës së Bujanocit.
Aktiviteti u zhvillua në Sallën e Shtëpisë së Kulturës në Bujanoc, në rastin e përvjetorit të vdekjes së Musliut. Sipas vendimit, flamuri i Republikës së Shqipërisë u vendos në skenë pa flamurin e Republikës së Serbisë.
Në një postim në Facebook, Rexhepi shkroi se flamuri kuq e zi nuk është provokim, por identitet dhe dinjitet. Ai theksoi se përdorimi i tij në një aktivitet përkujtimor është i natyrshëm dhe legjitim.
Rexhepi shtoi se kjo është hera e tretë që thirret personalisht për të njëjtën arsye, ndërsa KKSh-ja përballet për herë të dymbëdhjetë me procedurë të ngjashme për flamurin. Ai premtoi se do të vazhdojnë ta mbrojnë të drejtën për përdorimin e simboleve kombëtare me dashuri dhe vendosmëri.