Gjatë një interviste për rrjetin mediatik France 24, Komisionerja e BE-së për Zgjerimin, Marta Kos, vlerësoi vitin 2026 si një periudhë me dinamikë të lartë, ku janë hapur dhe mbyllur një numër rekord kapitujsh negociatash. Marta Kos e renditi Shqipërinë në bllokun e katër shteteve kryesuese të procesit të integrimit, së bashku me Malin e Zi, Moldavinë dhe Ukrainën.
Sipas Komisioneres, Mali i Zi mund t'i përfundojë negociatat teknike brenda fundit të këtij viti, me perspektivën për t'u anëtarësuar në vitin 2028. Ndërsa Moldavia u veçua për ritmin e lartë të reformave, Shqipëria u cilësua si vend në rrugë të mbarë. Në këtë kontekst, BE-ja po zbaton një politikë të kushtëzuar për fondet e ndihmës. Komisioni Evropian po vlerëson rialokimin e 330 milionë eurove nga fondet e destinuara për rajonin, për t'i zhvendosur ato nga vendet me ngecje në reforma drejt atyre me rezultate më të mira, si Mali i Zi dhe Shqipëria.
Tensionet diplomatike me Serbinë
Komisionerja Kos bëri të ditur anulimin e një misioni të planifikuar në Serbi, si pasojë e mosdakordësisë mbi zhvillimet pas funeralit të të dënuarit për krime lufte, Ratko Mlladiç. Ajo nënvizoi se glorifikimi i kriminelëve të luftës dhe mohimi i gjenocidit të Srebrenicës janë të papranueshme për Bashkimin Evropian dhe përbëjnë një pengesë në procesin e pajtimit rajonal.
Ndërkohë, u theksua se Mali i Zi ka regjistruar një shkallë realizimi prej 91% të reformave, ndërsa Bosnjë dhe Hercegovina paraqet një normë zbatimi prej 0%, për shkak të mosratifikimit të marrëveshjeve të nevojshme nga politika vendase.