Gjatë pjesëmarrjes në Konferencën për Rimëkëmbjen e Ukrainës (URC 2026), të zhvilluar në Gdansk të Polonisë, komisionerja për Zgjerim, Marta Kos, vlerësoi dinamikën aktuale të negociatave për integrimin e vendeve të Ballkanit Perëndimor. Ajo theksoi se procesi i zgjerimit ka marrë një shtysë të re, duke e cilësuar periudhën e ardhshme si vendimtare për vendet kandidate.
Sipas komisioneres Kos, Mali i Zi është kandidati më realist për t'u bërë anëtar i Bashkimit Europian brenda përfundimit të mandatit të saj, përkatësisht deri në vitin 2029. Lidhur me Shqipërinë, ajo vlerësoi përparimin e arritur, duke nënvizuar se vendi ka nisur mbylljen e kapitujve të negociatave. Ky proces po zhvillohet me një ritëm që nuk është regjistruar në 15 vitet e fundit.
Gjatë fjalës së saj, Marta Kos përmendi edhe mundësinë e anëtarësimit të Islandës, nëse qytetarët e këtij vendi do të shprehen pro këtij procesi në referendumin që pritet të organizohet në muajin gusht. Pavarësisht përshpejtimit të dinamikave, komisionerja theksoi nevojën që Bashkimi Europian dhe vendet kandidate të vazhdojnë me vendosmëri reformat për të përmbushur kriteret e integrimit.
Shqipëria, e cila aktualisht ndodhet në fazën e mbylljes së kapitujve të negociatave, mban si objektiv strategjik anëtarësimin e plotë në Bashkimin Europian brenda vitit 2030.