Në Forumin e Mastrihtit, drejtori për Zgjerimin në Komisionin Evropian, Gert-Jan Koopman, vlerësoi ecurinë e Shqipërisë dhe Malit të Zi në negociatat për anëtarësim në Bashkimin Evropian.
Ai theksoi se lufta në Ukrainë ka shënuar një pikë kthese në përshpejtimin e procesit të zgjerimit. "Vini re ritmin me të cilin po ecin Mali i Zi dhe Shqipëria. Po bëhet përparim, që është vërtet i paprecedentë", pohoi Koopman.
Sa i përket Shqipërisë, vendi kaloi nga zero në hapjen e të gjithë kapitujve të negociatave në pak më shumë se një vit. Për Malin e Zi, Koopman përmendi se ka mbyllur më shumë kapituj në gjashtë muajt e fundit sesa në dhjetë vitet e fundit. Kjo shpejtësi është e paimagjinueshme, sidomos duke pasur parasysh pritshmëritë për përfundimin e procesit në fund të vitit të ardhshëm.
Mali i Zi dhe Shqipëria po ecin shpejt dhe Komisioni Evropian po i ndihmon më shumë, sepse procesi është shumë i ndërlikuar dhe kërkon ndryshime të mëdha.
Koopman u ndal edhe te propozimet e reja për shtetet kandidate. "Ne duam që t’i anëtarësojmë këto shtete kandidate, por me masa mbrojtëse shumë të rrepta për t’u siguruar që, nëse gjërat shkojnë keq, pas përfundimit të procesit të kemi më shumë mjete për ta trajtuar çështjen", tha ai. Ai nënvizoi rreptësinë në fushën e antikorrupsionit, duke e cilësuar atë si interes të qytetarëve, jo vetëm si perspektivë evropiane teorike.
Shqipëria synon të përfundojë procesin e anëtarësimit në Bashkimin Evropian brenda vitit 2030.