Ministria e Arsimit, Shkencës, Teknologjisë dhe Inovacionit (MASHTI) ka reaguar ndaj raportimeve mediatike për aktakuzën e ngritur nga Prokuroria Speciale e Republikës së Kosovës më 31 dhjetor 2025 ndaj 12 zyrtarëve të kësaj ministrie dhe tre personave juridikë.
Ministria bën të ditur se nuk ka pranuar asnjë njoftim apo vendim zyrtar nga institucionet kompetente. Ajo mirëpret dhe respekton punën e institucioneve të pavarura të drejtësisë dhe premton të jetë e hapur dhe transparente ndaj çdo zhvillimi zyrtar.
MASHTI thekson respektimin e parimit të pafajësisë, siç garantohet nga Kushtetuta e Republikës së Kosovës. Gjithashtu, vlerëson rolin e mediave në informimin e publikut dhe u kërkon atyre të raportojnë në mënyrë të saktë, të bazuar në fakte dhe në përputhje me standardet profesionale të gazetarisë.
Sipas ministrisë, raportimet duhet të shmangin interpretimet e pasakta apo përgjithësuese, që mund të çojnë në keqinformim të opinionit publik, të dëmtojnë procesin gjyqësor dhe të cenojnë integritetin institucional.
MASHTI kërkon gjithashtu respektimin e të drejtave ligjore për mbrojtjen e të dhënave personale dhe të dhënave të ndjeshme, në përputhje me Ligjin Nr. 06/L-082 për Mbrojtjen e të Dhënave Personale dhe legjislacionin tjetër përkatës.
Zyrtarët dyshohen për veprat penale "Keqpërdorimi i pozitës apo autoritetit zyrtar", "Keqpërdorimi dhe mashtrimi në prokurim publik" dhe "Falsifikimi i dokumenteve".
Ministria ritheks se mbetet e përkushtuar ndaj transparencës institucionale dhe llogaridhënies për informimin e drejtë të publikut.