Prokuroria pranë Gjykatës së Shkallës së Parë të Juridiksionit të Përgjithshëm Shkodër ka përfunduar hetimet dhe ka dërguar për gjykim çështjen ndaj Alban Thika. I pandehuri akuzohet për veprën penale të "Mashtrimit, i kryer më shumë se një herë".
Sipas organit të akuzës, në kuadër të procedimit penal nr. 1751 të vitit 2024, rezultoi se Thika, në cilësinë e administratorit të një shoqërie tregtare që operonte në fushën e trajnimeve dhe ndërmjetësimit për studime jashtë vendit, ka mashtruar në mënyrë të përsëritur disa shtetas të huaj.
Hetimet kanë dokumentuar se personat e dëmtuar kanë kryer pagesa për procedura aplikimi dhe programe studimi, bazuar në premtimet e kompanisë. Megjithatë, shërbimet e premtuara ose nuk janë ofruar fare, ose janë realizuar vetëm pjesërisht, duke u shkaktuar atyre dëm pasuror.
Çështja i ka kaluar gjykatës për shqyrtim të mëtejshëm, ku do të vlerësohen provat dhe pretendimet e prokurorisë ndaj të pandehurit.
Përditësime
Prokuroria ka ngritur zyrtarisht akuzën për mashtrim ndaj administratorit të agjencisë që ndërmjetëson studime jashtë vendit. Sipas dosjes së dërguar për shqyrtim në gjykatë, vepra penale është kualifikuar bazuar në nenin 143, paragrafi 2 të Kodit Penal.