Prokuroria pranë Gjykatës së Shkallës së Parë të Juridiksionit të Përgjithshëm Shkodër bëri të ditur më 4 maj se ka përfunduar hetimet dhe ka dërguar në gjyq shtetasit Arsuel Curaj, Alma Guraj, Gezim Guraj dhe Vladimir Jaca.
Të katër akuzohen për veprën penale "Pastrimi i produkteve të veprës penale ose veprimtarisë kriminale" me pasoja të rënda, parashikuar në nenin 287/3 të Kodit Penal.
Hetimet, të nisura në vitin 2021 me numrin e procedimit penal 1280/2021, provuan se të pandehurit, në bashkëpunim me njëri-tjetrin, kanë kryer kontrata fiktive për shkëmbime pronash, dhurime dhe shitje, si dhe veprime bankare fiktive.
Qëllimi i këtyre veprimeve ka qenë pastrimi i produkteve penale në shumën prej 500 mijë eurosh.
Prokuroria bëri të ditur se kjo shumë është sekuestruar nga autoritetet e saj.
Çështja tani i kalon gjykatës për shqyrtim dhe vendimmarrje mbi fajësinë ose pafajësinë e të akuzuarve.