Prokuroria pranë Gjykatës së Shkallës së Parë të Juridiksionit të Përgjithshëm Korçë ka përfunduar hetimet në kuadër të çështjes penale nr. 357/2024 dhe ka dërguar në gjyq shtetasit J.K., K.K. dhe A.G.. Ata akuzohen për veprat penale "Largimi i të burgosurit nga vendi i qendrimit" (neni 323/1), "Ushtrimi pa licencë i veprimtarive financiare" në bashkëpunim (neni 170/ç/2 e 25) dhe "Pastrim i produkteve të veprës penale ose veprimtarisë kriminale" në bashkëpunim (neni 287/2) të Kodit Penal.
Më 28 mars 2024, shërbimet e Drejtorisë Vendore të Policisë Korçë konstatojnë shtetasin J.K. jashtë banesës së tij, ndonëse ai ndodhej nën masën e sigurimit "arrest në shtëpi". J.K. ishte i dënuar më parë për vepra penale, përfshirë trafikimin e narkotikëve dhe prodhimin dhe shitjen e tyre, dhe largohej gjatë ditës për të vazhduar veprimtarinë kriminale.
Gjatë kontrollit në banesë, policia sekuestron rreth 92 sende dhe dokumente, përfshirë kontrata noteriale shit-blerjeje, dhurimi, hipoteke dhe pengu për pasuri të luajtshme dhe të paluajtshme, si dhe mjete identifikimi, telefona celularë, çelësa automjetesh dhe automjete brenda dhe jashtë oborrit.
Nga hetimet rezulton se të tre personat ushtronin në mënyrë të përsëritur veprimtari kredidhënieje pa licencë nga Banka e Shqipërisë, të maskuara si huadhënie civile. Ata jepnin para me fajde, kryesisht mbi 200 mijë euro, duke vendosur garanci reale mbi pasuri të luajtshme dhe të paluajtshme me afate të shkurtra shlyerjeje, zakonisht 3-mujore. Vlera e pasurive përvetësuar rezulton shumë herë më e madhe se shumat e dhëna borxh, përfshirë raste ku për borxhe nga 1000 deri në 2000 euro kalonin në pronësi automjete ose pasuri më të vlefshme.
Prokuroria konkludon se të pandehurit kanë kryer edhe pastrim parash duke futur në qarkullim të ardhura kriminale përmes transaksionesh, llogarieve bankare dhe regjistrimeve pronësore fiktive.