Nxënësit e klasave të pesta në të gjithë vendin zhvillojnë sot provimin për Vlerësimin e Arritjeve të Nxënësve të Arsimit Fillor, i njohur si VANAF.
Ministrja e Arsimit Mirela Kumbaro iu drejtuar nxënësve, mësuesve dhe prindërve me një videomesazh para fillimit të provimit. Ajo u uroi sukses mbi 27 mijë nxënësve që marrin pjesë në testim.
Provimi vlerëson njohuritë e fituara gjatë ciklit fillor dhe përfshin pyetje nga tri lëndët kryesore: Gjuhë Shqipe, Matematikë dhe Dituri Natyre. Ministrja theksoi se ky është hapi i parë i nxënësve në sistemin e provimeve dhe se rezultatet do të ndihmojnë në përmirësimin e cilësisë së arsimit parauniversitar.
Kumbaro falënderoi mësuesit që kanë punuar me nxënësit dhe prindërit që i ndjekin ata gjatë këtij procesi.
Përditësime
Ministrja Kumbaro deklaroi se nxënësit e klasave të pesta janë më të vegjlit që marrin pjesë për herë të parë në sistemin e provimeve. Ajo e quajti provimin VANAF një provim simbolik që nis ciklin e provimeve të ardhshme. Sipas saj, rezultatet do të ndihmojnë në analizën e anëve të forta dhe të dobësive në procesin e mësimdhënies. 'Jam e bindur që do të dilni shumë mirë, sepse jeni më të mirët', u shpreh ajo.