Policia e Shkodrës sekuestroi mbi 56.7 kilogramë lëndë të dyshuar narkotike Cannabis Sativa, të ndarë në 10 thasë, në një zonë të pyllëzuar në fshatin Koman. Lënda u gjet gjatë operacionit të koduar “Gjurmët”, të zhvilluar pas disa javësh hetimesh me metoda proaktive. Në kuadër të operacionit u arrestuan katër persona, ndërsa një tjetër u procedua në gjendje të lirë.
Të arrestuarit janë P. F., 45 vjeç, banues në Gomsiqe të Vaut të Dejës; M. P., 39 vjeç, banues në Dush të Vaut të Dejës; K. K., 33 vjeç, banues në Shkodër; dhe D. N., 67 vjeç, banues në Tiranë. A. F., 38 vjeç, banues në Gomsiqe të Vaut të Dejës dhe vëllai i 45-vjeçarit, u procedua në gjendje të lirë.
Sipas hetimeve, pesë personat dyshohet se bashkëpunonin për transportimin e kanabisit me automjete dhe varka drejt zonës së pyllëzuar në Koman, ku e fshihnin dhe e përgatitnin për shitje. Operacioni u krye nga Sektori për Hetimin e Narkotikëve i Drejtorisë Vendore të Policisë Shkodër, në bashkëpunim me Seksionin e Mbështetjes Operacionale.
Gjatë ndërhyrjes, policia kontrolloi një ambient të përshtatur për kamping, në pronësi të P. F., si dhe automjetet në përdorim të K. K. dhe M. P. Në këto vende u gjetën 10 thasët me lëndën e dyshuar narkotike, me peshë mbi 56.7 kilogramë. Ato u sekuestruan si prova materiale.
Policia njoftoi se vijon puna për dokumentimin e plotë të veprimtarisë së dyshuar dhe identifikimin e personave të tjerë që mund të jenë përfshirë. Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër për veprime të mëtejshme.