Në mjediset e Muzeut Etnografik në Durrës u zhvillua mbrëmja poetike “Një gotë për Dorin”, një aktivitet i organizuar nga trupa e Teatrit “Aleksandër Moisiu”, kushtuar krijimtarisë së shkrimtarit, poetit dhe publicistit Teodor Keko. Kjo ngjarje solli në vëmendje trashëgiminë letrare të njërit prej zërave më të veçantë të letërsisë shqipe pas viteve ’90.
Nën regjinë e Andia Xhungës, aktorët Mimoza Marjanaku, Ervin Doko, Era Çaushi, Romir Zalla, Adelina Muça, Jaho Guma, Suela Bako, Marvin Tafaj, Alesia Xhemalaj dhe Xhelal Tafaj interpretuan poezi dhe fragmente nga krijimtaria e autorit. Aktori Romir Zalla theksoi se rikthimi te poezia e Teodor Kekos përbën një përjetim të veçantë, sidomos për shkak të ndjeshmërisë së rrallë në vargjet kushtuar bashkëshortes së autorit.
Bashkëshortja e poetit, Xhuli Keko, e vlerësoi këtë aktivitet si mënyrën më të bukur për të përkujtuar Dorin, në prag të 24-vjetorit të ndarjes së tij nga jeta dhe ditëlindjes së tij më 2 shtator. Ajo njoftoi se ka ardhur momenti për të përgatitur dhe botuar veprën e zgjedhur të Teodor Kekos, duke përmbyllur kështu publikimin e trashëgimisë së lënë pas.
Teodor Keko u shqua gjatë jetës si një figurë shumëdimensionale, duke kontribuar si poet, prozator, publicist dhe politikan. I njohur për stilin e tij të drejtpërdrejtë, ironinë e hollë dhe ndjeshmërinë, ai ndërroi jetë në vitin 2002, në moshën 43-vjeçare. Homazhi në Durrës, ku ishin të pranishme në mënyrë simbolike fotoja dhe xhaketa e autorit, shërbeu si dëshmi se krijimtaria e tij vazhdon të lexohet dhe të frymëzojë lexuesit e artistët e brezave të ndryshëm.