Mbrojtja e Hashim Thaçit, e përfaqësuar nga avokati Luka Mishetiq, ka kërkuar nga trupi gjykues në rastin e ish-krerëve të UÇK-së të urdhërohet Prokuroria të mos paraqesë prova të reja, përveç në rrethana të jashtëzakonshme.
Sipas parashtresës së mbrojtjes, më 18 shkurt 2026 trupi gjykues ka mbyllur procedurat në këtë fazë gjyqësore. Ai ka deklaruar shprehimisht se, në përputhje me Rregullën 136 të Rregullores së Procedurave dhe Provave, nuk mund të paraqiten më parashtresa ose prova të tjera ndaj panelit, përveç në rrethana të jashtëzakonshme.
Megjithatë, më 4 mars 2026 Prokuroria ka vendosur tre artikuj të rinj në qasje për panelin, duke pretenduar se i nënshtrohen Rregullës 103. Kjo rregullë parasheh që Prokurori i Specializuar të vërë menjëherë në dispozicion të mbrojtjes çdo informacion që sugjeron pafajësinë, lehtëson fajësinë e të akuzuarit ose ndikon në besueshmërinë e provave të prokurorisë, në varësi të Rregullave 107 dhe 108.
Mbrojtja ka kërkuar sqarim nga Prokuroria nëse po njoftohej trupi gjykues për këto prova. Më 10 mars 2026, Prokuroria ka vazhduar me dy artikuj të tjerë në Legal Workflow, po me pretendimin e nënshtrimit ndaj Rregullës 103.
Mbrojtja thekson: "Rregulla 136 është e qartë: kur procedurat u mbyllën më 18 shkurt 2026, nuk mund të bëhen më parashtresa të tjera ndaj Panelit dhe Paneli nuk mund të pranojë më parashtresa të tjera ose të dëgjojë prova, përveç nëse rrethana të jashtëzakonshme kërkojnë ndryshe". Trupi gjykues i kishte udhëzuar palët për këtë më 18 shkurt 2026.