Mbrojtja e ish-presidentit Hashim Thaçi vazhdon të kontestojë ligjshmërinë e dorëzimit të provave nga Zyra e Prokurorit të Specializuar (ZPS) pas mbylljes së çështjes penale kundër Hashim Thaçit, Kadri Veselit, Rexhep Selimit dhe Jakup Krasniqit në Dhomat e Specializuara të Kosovës.
Kryembrojtësi Lluka Mishetiq ka paraqitur kundërpërgjigje ndaj ZPS-së, duke kërkuar që kjo të ndalojë dorëzimin e provave. Më 13 mars, mbrojtja i kishte kërkuar trupi gjykues të urdhëronte ZPS-në për mosparaqitje të provave, duke u mbështetur në Rregullin 136 të Rregullores së Procedurës dhe Provave.
Më 25 mars, kryeprokurorja e specializuar Kimberly West i është përgjigjur kërkesës, duke kërkuar refuzimin e saj. ZPS argumenton se zbulimet e provave plotësojnë kriteret e nevojshme dhe nuk përbëjnë paraqitje provash apo parashtrimesh sipas Rregullit 136. Ajo thekson se përmbushja e detyrimeve të vazhdueshme të zbulimit respekton Rregullin 112 dhe jurisprudencën e dhomave të specializuara. Kërkesa, sipas ZPS-së, shpërfill këto dispozita dhe duhet të refuzohet.
Më 30 mars, mbrojtja e Thaçit i është kundërpërgjigjur parashtrimit të ZPS-së. Ajo vlerëson se qëndrimi i ZPS-së bazohet në një interpretim të gabuar të rregullave dhe, nëse nuk ndryshohet, do të lejonte shkelje të vazhdueshme të të drejtës për gjykim të drejtë.