Në seancën e zhvilluar më 18 shkurt 2026 në Hagë, mbrojtja e Jakup Krasniqit kërkoi shpalljen e tij të pafajshëm nga trupi gjykues i Dhomatës së Specializuara.
Avokati Aidan Ellis hodhi poshtë pretendimet e Zyrës së Prokurorit të Specializuar (ZPS) se klienti i tij ishte epror i Bislim Zyrapit. Ai theksoi se vetë Zyrapi ka pranuar se ishte shef i Shtabit të Përgjithshëm të Ushtrisë Çlirimtare të Kosovës (UÇK). "Zyrapi i është referuar vetes si shef i Shtabit të Përgjithshëm. Ai ka nënshkruar urdhra në këtë cilësi. Anëtarë të tjerë të UÇK-së, të njohur me tituj ushtarakë, i kanë drejtuar Zyrapit dokumente me titullin shef i shtabit. Kemi dëgjuar dëshmitarë që i janë referuar Zyrapit si shef i Shtabit", tha Ellis, duke përmendur Naim Malokun, Sokol Bashtën dhe Rrustem Mustafën.
Sipas mbrojtjes, ZPS po përpiqet të minimizojë rolin e Zyrapit, duke e quajtur "e pabazuar" dëshminë e tij se Krasniqi ishte eprori i tij.
Ellis akuzoi Prokurorinë se ndryshon qëndrimet për përgjegjësinë e të akuzuarve bazuar në anëtarësinë në Shtabin e Përgjithshëm. Ai përmendi se kryeprokurorja kishte deklaruar se për fajësimin nuk mjafton vetëm anëtarësia në shtab, por të hënën prokurorët e përdorën pikërisht këtë argument. Për kontributin në NPK, përgjegjësia individuale duhet të identifikohet qartë për secilin të akuzuar, në të kundërt çështja bëhet kundër të gjithë Shtabit të Përgjithshëm, jo ndaj katër të akuzuarve.
Seanca shkoi në pauzë dhe pas pushimit pritet që ish-eprorët e UÇK-së të deklarohen. Seanca rifillon në orën 14:15.