Deputeti Fatmir Mediu zhvilloi një seri takimesh në Departamentin e Shtetit të SHBA dhe në Asamblenë Parlamentare të NATO-s në Uashington DC, më 19 mars 2026. Gjatë këtyre takimeve, ai theksoi domosdoshmërinë e rritjes së shpenzimeve të mbrojtjes në nivelin 5%, si masë për forcimin e NATO-s dhe garantimin e sigurisë kolektive.
Në takimin e parë në Departamentin e Shtetit, ku mori pjesë ndihmëssekretari për Evropën dhe Azinë Brendan Hanrahan, u prezantua qasja e administratës së presidentit Donald Trump. Kjo qasje vendos theks në rritjen e shpenzimeve të mbrojtjes, mbështetjen nga industria e mbrojtjes dhe zhvillimin e shpejtë të saj. Hanrahan nënvizoi nevojën që Europa të zhvillojë një industri mbrojtjeje me nivele të larta operacionaliteti dhe ndërveprimi, duke hequr dorë nga politikat proteksioniste. Ai ritheksoi fjalët e sekretarit të Shtetit Marco Rubio, se SHBA duan një Evropë të fortë.
Mediu kërkoi angazhim më të madh të SHBA në Ballkan, për bashkëpunim në shpenzimet e përbashkëta të vendeve të NATO-s dhe partnereve, rritje të bashkëpunimit politik, forcim të deterrencës ushtarake dhe investime amerikane. Ai ngriti shqetësimin për mundësinë e reduktimit të pranisë në KFOR, veçanërisht kur Serbia ka rritur shpenzimet ushtarake dhe ka mbështetje nga Rusia dhe Kina, si në rastin e blerjes së raketave ofensive. Gjithashtu, përmendi shqetësimin e një grupi kongresmenësh drejtuar Rubios për këtë çështje.
Mediu vuri theks në nevojën për harmonizimin e politikave të kontrollit të investimeve në fushën e mbrojtjes në Shqipëri dhe vendet e Ballkanit. Kjo, sipas tij, nuk duhet të kufizohet vetëm në kuadrin ligjor, por të përfshijë forcimin e kapaciteteve institucionale për zbatim dhe vlerësim, për të parandaluar depërtimin e aktorëve si Rusia dhe Kina. Ai theksoi se rritja e pranisë ekonomike të Kinës në Shqipëri është realitet dhe mund të rrezikojë sigurinë kombëtare si dhe atë të partnerëve strategjikë.
Në një tjetër takim, me zëvendësndihmëssekretarin për kontrollin e tregtisë së mbrojtjes Michael Vaccaro, u diskutua angazhimi i SHBA në këtë fushë.