Mentor Çuku u emërua Zëvendësdrejtor i Byrosë Kombëtare të Hetimit (BKH) në përfundim të një procesi konkurrues dhe transparent.
Drejtori i BKH-së e bëri emërimin me pëlqimin e Drejtuesit të Prokurorisë së Posaçme kundër Korrupsionit dhe Krimit të Organizuar (SPAK), në zbatim të pikës 3 të nenit 36 të Ligjit nr. 95/2016 "Për organizimin dhe funksionimin e institucioneve për të luftuar korrupsionin dhe krimin e organizuar", i ndryshuar. Mandati i Zëvendësdrejtorit është 4-vjeçar, me të drejtë rizgjedhjeje vetëm një herë.
Për këtë pozicion aplikuan 11 kandidatë, të cilët plotësonin kriteret ligjore dhe profesionale. Të gjithë u vlerësuan për nivelin e lartë të përgatitjes profesionale, përvojën në hetim dhe aftësitë drejtuese, çka e bëri procesin sfidues.
Mentor Çuku është hetues në BKH dhe zotëron përvojë të gjatë në hetimin e veprave penale të korrupsionit, krimit të organizuar dhe krimeve të rënda. Gjatë karrierës ai është dalluar për integritet profesional të lartë, aftësi drejtuese dhe përkushtim.
BKH shprehu mirënjohje për të gjithë kandidatët, duke theksuar profesionalizmin dhe angazhimin e tyre ndaj misionit institucional. Institucioni ripërtërin angazhimin për hetimin e korrupsionit dhe krimit të organizuar në shërbim të interesit publik dhe shtetit të së drejtës.
Disa burime raportojnë se Mentor Çuku është vëllai i komisarit të vrarë Artan Çuku.
Përditësime
SPAK njofton se Mentor Çuku, emëruar Zëvendësdrejtor i Byrosë Kombëtare të Hetimit (BKH), është ndër hetuesit e parë të saj.
Ai është vëllai i Artan Çukut, kryekomisar i vrarë në atentat në 2017.