Ministria për Evropën dhe Punët e Jashtme (MEPJ) bëri të ditur se po ndjek me vëmendje të plotë rastin e ndalimit të katër shtetasve shqiptarë nga autoritetet serbe për shkak se mbanin simbole shqiptare në makinë.
Përmes Ambasadës së Republikës së Shqipërisë në Beograd, MEPJ ka kërkuar zyrtarisht informacion të plotë mbi rrethanat e ndalimit, si dhe për të garantuar respektimin e të drejtave të shtetasve shqiptarë në përputhje me legjislacionin serb dhe standardet ndërkombëtare.
Ambasada është në komunikim të vazhdueshëm me autoritetet serbe dhe ofron asistencë konsullore të plotë, duke përfshirë kontaktet me familjarët e të ndaluarve dhe mundësimin e takimeve me avokatë.
Republika e Shqipërisë pret që veprimet e autoriteteve serbe të zhvillohen në përputhje me shtetin e së drejtës, duke respektuar të drejtat themelore dhe garancitë procedurale për çdo qytetar.
Situata ndiqet nga afër dhe çdo zhvillim i ri do të trajtohet me seriozitet maksimal, sipas reagimit të MEPJ-së për Euronews Albania.
Përditësime
Ministria e Brendshme serbe ngriti akuzë zyrtare kundër katër shqiptarëve të arrestuar për "nxitje të urrejtjes dhe intolerancës kombëtare, racore dhe fetare". Sipas autoriteteve serbe, të arrestuarit shfaqën video ku vishnin fanella me mbishkrimin Shqipërisë Etnike, thirrje dhe shqiponjë, duke përdorur fjalë të papërshtatshme ndaj Serbisë. Gjykata vendosi 48-orësh paraburgim para caktimit të masës së sigurisë. Të arrestuarit udhëtonin drejt Polonisë për një ndeshje futbolli. Zëdhënësi i MEPJ-së, Alteo Hysi, deklaroi se Ministria ndjek rastin me shqetësim.