Tomash Rigo, një nga lojtarët kryesorë të përfaqësueses së Sllovakisë në futboll, ka deklaruar se është i gatshëm për sfidën vendimtare kundër Kosovës në kuadër të plejofit kualifikues për Botërorin 2026. Mesfushori 23-vjeçar ka marrë pjesë në të gjitha ndeshjet e fazës kualifikuese dhe pritet të grumbullohet edhe për ndeshjet e marsit.
Gjysmëfinalja e plejofit mes Sllovakisë dhe Kosovës do të zhvillohet më 26 mars në Bratisllavë. Fituesi i kësaj përballjeje do të kalojë në finale, ku do të ndeshet me fituesin e duelit mes Turqisë dhe Rumanisë, gjithashtu në shtëpi. Tashmë është përcaktuar edhe grupi ku do të vendoset fituesi i këtij plejofi në turneun final të Botërorit.
Rigo, që aktivizohet te Stoke City në Championshipin anglez, shprehet optimist për shanset e kualifikimit. Ai vlerëson se grupi i ardhshëm është i favorshëm dhe ofron mundësi për të marrë pikë dhe për të avancuar më tej. Mesfushori thekson se skuadra do të japë maksimumin në mars për të siguruar pjesëmarrjen në Kupën e Botës.
Në një deklaratë për faqen zyrtare të Federatës së Futbollit të Sllovakisë, Rigo ka shprehur edhe entuziazmin për eksperiencën e re që e pret. “Mendoj se grupi ku do të hyjë fituesi i këtij plejofi është i pranueshëm dhe kemi mundësi të marrim disa pikë, madje edhe të avancojmë. Do të japim maksimumin në mars për të luajtur në Botëror. Nuk kam qenë kurrë më parë në Amerikë, ndaj shpresoj të shoh vendin për herë të parë me ekipin nacional”, ka thënë ai.