Pedrag Mijatoviç, zëvendëspresident i Partizanit të Beogradit, është distancuar plotësisht nga transferimi i sulmuesit malazez Andrej Kostiç te Milani. Ky transferim u bë nga Igli Tare, duke paguar 3 milionë euro te klubi serb, ndonëse Mijatoviç më parë kishte deklaruar se lojtari mund të shitej për 20 milionë euro.
Në një deklaratë drejtuar tifozëve dhe publikut sportiv, Mijatoviç deklaroi se nuk është konsultuar në asnjë mënyrë për këtë lëvizje dhe nuk e ka parë ofertën e Milanit. Ai thekson se, edhe nëse do të ishte përfshirë në vendimmarrje, do të kishte qenë absolutisht kundër pranimit të një oferte aq të ulët.
Sipas tij, ky vendim përbën shkelje serioze të rregullores së klubit, pasi ai është përgjegjës për sektorin sportiv, duke përfshirë politikën e transferimeve dhe zhvillimin e lojtarëve. Mijatoviç akuzon pjesën tjetër të bordit drejtues, të udhëhequr nga Rasim Ljajiç, për marrjen e vendimit pa konsultimet e duhura. Ai kërkon mbledhje të jashtëzakonshme të bordit.
Mijatoviç përmend se në muajt e fundit ka pasur kontakte intensive me përfaqësues të ekipeve nga pesë ligat kryesore evropiane për lojtarët e rinj të Partizanit, duke përfshirë Kostiç. Të gjithëve u është bërë e qartë se lojtarët kanë klauzola lirimi prej shumë milionë eurosh dhe politika e klubit është zhvillimi adekuat i talenteve.
Ai vlerëson se ky transferim vendos një precedent të rrezikshëm, që do të ndikojë negativisht në perceptimin e vlerës së lojtarëve të Partizanit të Beogradit.