Një shtetas 22-vjeçar nga Bregu i Fildishtë është vënë në pranga nga autoritetet italiane në Milano, pas sulmit me thikë ndaj një burri 55-vjeçar. Ngjarja ka ndodhur të shtunën, më 4 korrik, jashtë një bari në zonën e San Siros.
Sipas forcave të rendit, autori e ka sulmuar viktimën nga pas, duke e goditur 20 herë me një thikë me gjatësi 21 centimetra në pjesë të ndryshme të trupit, përfshirë kokën, qafën, gjoksin dhe barkun. Sulmi është regjistruar plotësisht nga kamerat e sigurisë, ndërsa autori është ndaluar nga klientët e lokalit përpara se të arratisej.
I plagosuri është dërguar menjëherë në spitalin Niguarda në Milano, ku vijon të mbahet në gjendje kritike për jetën. Pas ndalimit nga policia, i dyshuari ka deklaruar: “U argëtova, do ta bëj përsëri sapo të dal”.
Prokuroria ka kërkuar konfirmimin e masës së arrestit për akuzën e tentativës për vrasje, duke e vlerësuar 22-vjeçarin si rrezik për arratisje dhe përsëritje të veprës penale. Seanca për marrjen në pyetje nga gjyqtari është parashikuar të mbahet mëngjesin e së hënës, më 6 korrik.