Ministri në detyrë i Punës, Familjes dhe Vlerave të Luftës Çlirimtare, Andin Hoti, ka nënshkruar një vendim për vendosjen e standardeve të reja në komunikimin me qytetarët. Me anë të këtij akti, synohet krijimi i një kulture institucionale që garanton qasje të drejtpërdrejtë, transparente dhe efikase.
Sipas këtij vendimi, çdo kërkesë, ankesë apo parashtresë e depozituar në ministri do të regjistrohet zyrtarisht. Institucioni zotohet se qytetarët do të marrin një përgjigje ose informacion mbi statusin e lëndës së tyre brenda një afati prej 10 ditëve të punës.
Në rastet kur përgjigjja nuk mund të jepet brenda këtij afati, zyrtarët janë të detyruar të njoftojnë qytetarin për arsyet e vonesës dhe kohën e pritshme për përfundimin e trajtimit të çështjes.
Andin Hoti deklaroi se respekti për qytetarin është obligim për çdo zyrtar publik dhe se ky përmirësim ka qenë prioritet që nga dita e parë e mandatit të tij. Ministria ka funksionalizuar tashmë kanale të reja komunikimi, duke përfshirë adresa zyrtare të dedikuara, për të lehtësuar ndërveprimin me publikun.