Ministri për Evropën dhe Punët e Jashtme, Ferit Hoxha, prezantoi sot një sistem të ri komunikimi me qytetarët, me qëllim rritjen e cilësisë së shërbimeve konsullore. Duke filluar nga data 9 shtator 2026, në të gjitha pikat e shërbimit, përfshirë sportelet, sallat e pritjes, Ministrinë, përfaqësitë diplomatike dhe konsullatat jashtë vendit, është vendosur një kod i skanueshëm (QR Code).
Ky mekanizëm i lejon qytetarët të shprehin përshtypjet e tyre, të evidentojnë vërejtje apo problematika specifike dhe të propozojnë përmirësime për mënyrën e ofrimit të shërbimeve. Sipas ministrit Hoxha, ky proces shërben si një derë e hapur mes qytetarit dhe institucionit, duke synuar që shërbimi konsullor të jetë më i shpejtë, i thjeshtë dhe i aksesueshëm.
Në një videomesazh, ministri theksoi se shërbimi konsullor nuk përbën thjesht një procedurë administrative, por është pika kyçe e kontaktit mes shtetit dhe qytetarit, ku kërkohet përgjegjshmëri dhe profesionalizëm. Kjo nismë vjen si pjesë e përpjekjeve për ta afruar administratën me qytetarët dhe për të përdorur vlerësimet e tyre si instrument për reformimin e shërbimeve publike. Ministri u bëri thirrje qytetarëve që të bashkëpunojnë duke identifikuar çfarë nuk funksionon, në mënyrë që institucionet të ndërhyjnë për të përmirësuar standardet e tyre.