Ministri për Evropën dhe Punët e Jashtme, Ferit Hoxha, zhvilloi takime me zyrtarë të lartë të Departamentit amerikan të Shtetit (DASH) gjatë vizitës së tij në Uashington. Takimet u mbajtën në margjinat e Ministerialit mbi Rikthimin e Terrorizmit Politik.
Gjatë bisedimeve me Zëvendës Sekretarin e Shtetit, Christopher Landau, dhe Nënsekretaren për Çështjet Politike, Allison Hooker, u diskutuan çështje me interes të ndërsjellë midis Shqipërisë dhe Shteteve të Bashkuara të Amerikës. Ministri Hoxha vlerësoi lidhjen e qëndrueshme midis dy vendeve, duke theksuar se marrëdhënia mbështetet në vlera të përbashkëta dhe dekada partneriteti të fortë.
Në një reagim në rrjetin social X, ministri Hoxha shprehu angazhimin e përbashkët për të forcuar bashkëpunimin në fusha si siguria, demokracia dhe prosperiteti. Edhe Nënsekretarja Allison Hooker konfirmoi takimin, duke nënvizuar se biseda u fokusua në mundësitë për të thelluar marrëdhëniet diplomatike dhe sigurinë e përbashkët.