Ministri i Drejtësisë Besfort Lamallari mblodhi më 14 janar drejtuesit e të gjitha Institucioneve të Ekzekutimit të Vendimeve Penale në vend. Takimi erdhi pas shkarkimit të drejtorit të IEVP Durrës dhe pezullimit të menjëhershëm të të gjithë zinxhirit përgjegjës për ngjarjen e rëndë, të cilën disa burime e lidhin me arratisjen e Altin Ndocit.
Gjatë takimit, Lamallari kërkoi masa urgjente për forcimin e kontrollit, rritjen e sigurisë dhe parandalimin e futjes së sendeve të paligjshme në burgje. Ai udhëzoi Drejtoria e Përgjithshme e Burgjeve të vlerësojë parametrat e sigurisë dhe rishpërndarjen në IEVP Durrës, duke konsideruar transferimin e të dënuarve ose paraburgosurve me rrezikshmëri në burgje të sigurisë së lartë.
Ministri urdhëroi Shërbimin e Kontrollit të Brendshëm në Sistemin e Burgjeve të shpeshtojë kontrollet në të gjitha institucionet e ekzekutimit të vendimeve penale për të parandaluar çdo tentativë cënimi të sigurisë.
Në deklaratën e tij, Lamallari theksoi se siguria në burgje është prioritet absolut dhe nuk do të tolerohet neglizhence apo shkelje e procedurave. Ai paralajmëroi se çdo sfidë ndaj rendit dhe autoritetit të ligjit cënon sigurinë publike dhe përgjegjësit do të përballen me pasoja ligjore pa kompromis.